ఆ తరం అమ్మమ్మ -- ఈ తరం అమ్మాయి -- మధ్యలో అమాయకపు అమ్మ!!! Episode 2

Episode 2

ప్రభ ఈతరం అమ్మాయి, తన హద్దుల్లో తానుండేది, friends gangలో  అబ్బాయిలున్నప్పటికీ వాళ్ళకి ఎప్పుడూ అతి చనువు ఇచ్ఛేది కాదు ... ఇలా సాగుతున్న సమయంలో పరీక్షలు దగ్గరికి వచ్చాయి. స్వతహాగా తెలివిగల పిల్లైనా ప్రభకి electronics subjects అంటే భయం. ఆ భయంతోనే తాను చదివే collegeలో ECEలో seat వచ్చినా వద్దని CSE బ్రాంచ్ తీసుకుంది. పక్కింటి aunty వాళ్ళ అబ్బాయికి నీకన్నా పెద్ద ర్యాంకు వచ్చింది కానీ వాడు ECE తీసుకున్నాట్ట మీ కాలేజీలోనే. ECE తీసుకుంటే కావాలంటే electronics వైపైనా వెళ్లచ్చుట, Software job అయినా చేయచ్చుట... మన ఇష్టం అట, ఎంతమంది చెప్పినా వినకుండా నువ్వేమో computer తెలుకున్నావ్ అంటూ అమ్మమ్మ దెప్పిపొడిచినా తన నిర్ణయం ప్రకారమే CSEలో join అయింది ప్రభ. కానీ పాపం B.TECH ప్రతి branchలో వేరే branch subjects ఏవో ఒకటి ఉంటాయి అని తర్వాతే తెలుసుకుంది ... B.Tech 1st yearలో distinction percentageలో pass అయిన ప్రభకి, 2nd yearలో EDC subject దెబ్బకి పరీక్షల భయం పట్టుకుంది ...

college first కాకున్నా ఎపుడూ top 5లో మాత్రం ఉండే ప్రభ, ఈ సారి మాత్రం EDC దెబ్బకి బెదిరిపోయి exam fever తెచ్చుకుంది ... 24/7 watsapp groupలో activeగా ఉండే ప్రభ నుండి 2 రోజులుగా messages లేకపోవడంతో, తన friend యాస్మిన్ ఏమయిందో కనుక్కుందాం అని ఇంటికి వచ్చి, అసలు విషయం తెలుసుకుని "మా అన్నయ్య ఉన్నాడుగా ఆమీర్ తాను ECEలో మన university topper, tuitions కూడా చెప్తుంటాడు మనకు next week నుండి ఎలాగూ preparation holidays కాబట్టి, నువ్వు మా ఇంటికిరా, ఇద్దరికీ ఒకేసారి EDC cover చేస్తాడు" అని చెప్పి బయల్దేరుతుంది ... doctor ఇచ్చిన మందుల కన్నా యాస్మిన్ మాటలు ఇచ్చిన ధైర్యానికే జ్వరం తగ్గినట్టయింది ప్రభకి.

              ఒక 3 రోజుల్లో జ్వరం నుండి కోలుకున్న ప్రభ, తన పరీక్షలకి పెద్దగా time లేదని, యాస్మిన్ వాళ్ళ ఇంటికి combine studiesకి వెళ్తానని సుగణతో చెప్పడం విన్న ప్రభావతమ్మ ... అదేమిటే వాళ్ళేమిటి మనమేమిటి అంటూ సొంటూ లేకుండా అని ఎదో చెప్పబోతున్న పెద్దావిడని ఆగమన్నట్టు సైగ చేసిన ప్రభ నాకు తెలుసులే అంటూ books తీసుకుని "అమ్మా నేను యాస్మిన్ వాళ్ళింటికి combine studiesకి వెళ్తున్నా వంట చేయద్దు" అని అమ్మమ్మకి వినపడేలా చెప్పి వెళ్తుంది ... అది విన్న ప్రభావతమ్మ అగ్గి మీద గుగ్గిలమైనట్టు "ఇదంతా నువ్వు ఇచ్చిన చనువే, అది ఏమి అడిగినా ఒక్క మాట కూడా ఎదురుచెప్పవు అని కూతురు మీద ఎగురుతుంది" ... షరా మామూలే అన్నట్టు సుగుణమ్మ "నేనేం చేయనమ్మా" అని  ఓ నవ్వు నవ్వి తన ఇంటి పనిలో పడిపోతుంది ... ప్రభ చేసిన పనికన్నా, తన మాట పట్టనట్టు వాళ్ళ అమ్మతో చెప్పి వెళ్ళడంతో ఊగిపోయిన పెద్దావిడ "అది మాట్లాడే దాక నేను మాత్రం దానితో మాట్లాడను" అని మంగమ్మ శబధం చేసి కూర్చుంది ...

                సశేషం ... next episodeతో మళ్ళీ కలుద్దాం .....

Previous Episode

ఆ తరం అమ్మమ్మ -- ఈ తరం అమ్మాయి -- మధ్యలో అమాయకపు అమ్మ!!!

ముందు మాట 

           రాయాలి అనే విత్తనాన్ని నా మెదడులో వేసి, రాతలో నడకలు నేర్పి, అనుక్షణం మమ్మల్ని రాయమని ప్రోత్సహించి, తన చివరి క్షణం వరకు ఎదో ఒకటి చదువుతూ / రాస్తూ గడిపిన మా అమ్మమ్మ గారు శ్రీమతి నూతలపాటి ప్రభావతి అమరేశ్వరరావు గారికి అంకితం ....

ఇందులోని పాత్రలు కేవలం కల్పితం ఎవరిని ఉద్దేశించినవి కాదు .....

ఇది నేను చేసిన మొదటి ప్రయత్నం, తప్పకుండ మీకు నచ్చుతుందని అనుకుంటున్నాను ... చదివిన తర్వాత మీ సలహాలు Comments లో ఇవ్వండి, దయచేసి నా blogని follow అవ్వండి .... 

EPISODE - 1

కౌసల్యా సుప్రజా రామ పూర్వాసంధ్యా ప్రవర్తతే | ఉత్తిష్ఠ నరశార్దూల కర్తవ్యం దైవమాహ్నికమ్ ||….

సుప్రభాతం శబ్దానికి చిరాగ్గా కళ్ళు నలుపుకుంటూ లేచింది ప్రభ ... ఈ అమ్మమ్మ ఒకటి Sunday కూడా నిద్రపోనివ్వకుండా పొద్దున్నే సుప్రభాతం పెట్టి లేపేస్తుంది అని phone చూస్తూ bed మీద నుండి దిగి hallలోకి  నడుచుకుంటూ వచ్చింది. "ఇదిగో వచ్చింది మైసూరు మహారాణి, coffee ఇఛ్చి లేపలేదని కంపలా మీద పడకముందే త్వరగా coffee cup తీసుకుని రా …" అన్న అమ్మమ్మ మాటలు వింటూనే పుండు మీద కారం చల్లినట్లు లేచింది ప్రభావతి.

ఇదిగో అమ్మమ్మ ఏదైనా నేను మా అమ్మ చూసుకుంటాం, మధ్యలో నువ్వు రాకు, ముసలి దానివి కృష్ణ రామ అనుకుంటూ కూర్చోక నీకెందుకు నా గురించి! అని కసురుకుని వంటింట్లోకి వెళ్ళి అమ్మ ఇచ్చిన కాఫీ తాగుతూ, అసలు ఎలా భరిస్తున్నావమ్మా ఈ tortureని ఇన్నేళ్ళుగా అని అడిగింది ప్రభా. దానికి సమాధానం అన్నట్లుగా ఎప్పటి లాగానే సుగుణ ఒక చిన్న నవ్వు నవ్వింది. ఏంటో మీ తల్లి కూతుళ్ళు నాకర్ధం కారు, ఈమేమో సూర్యకాంతం నువ్వేమో సావిత్రి అనుకుంటూ ప్రభ మళ్ళీ తన phoneలో మునిగిపోయింది.

తనని disturb చేయడానికే ఉన్నట్లుగా మళ్ళీ అమ్మమ్మ వచ్చి ఇదిగో నేను ఆనాటి సూర్యకాంతం అయితే, నువ్వు  ఈకాలం సూర్యకాంతంవే ... అందుకే నీకు నాపేరు పెట్టారు, ఇద్దరం ఒకే రకం అని అంటూ బయటకి వెళ్ళింది ప్రభావతమ్మ ... అమ్మ ప్రభావతమ్మ పేరునే  తన కూతురికి పెట్టుకుంది సుగుణ, దాన్ని కూతురు trendyగా  ప్రభ అని మార్చుకుంది.

వయసు 70లో ఉన్నా కూడా బయట పనులన్నీ ప్రభావతమ్మే చూసుకుంటుంది. భర్త ఆస్తినంతా హారతి కర్పూరంలా తగలేసి వెళ్ళిపోయాడు, తన పుట్టింటి వాళ్ళిచ్చిన ఇంటిని జాగ్రత్తగా కాపాడుకుని అదే కట్నంగా ఇచ్చి కూతురి పెళ్ళి చేసింది ప్రభావతమ్మ. పెళ్ళి అయిన సంవత్సరానికి కూతురు కాన్పుకని దింపెళ్ళిన అల్లుడు మళ్ళీ రాలేదు. రాయి ఉలిదెబ్బలు తిని నిలబడి శిల్పం అయినట్లు, ఇలా దెబ్బమీద దెబ్బలు తిన్న ప్రభావతమ్మ ఎవరి మీద ఆధారపడకుండా, వాళ్ళకున్న ఒకే ఆస్తి ఇంటిని అద్దెకిచ్చి అవి వసూలు చేస్తూ కుటుంబానికి అన్ని తానై నిలబడింది.

మొదటి నుండి కొంచెం బెరుగ్గానే ఉండే సుగుణ, భర్త ఏమయ్యాడు అనే చుట్టుపక్కల వారి ప్రశ్నలకు సమాధానం చెప్పలేక, అన్నిటికి సమాధానంగా ఒక చిరునవ్వు నవ్వడం నేర్చునుకుంది.

అమ్మమ్మతో ఘడియకో గొడవ, పూటకో పేచీ పడుతూ ... చిన్న తనం నుండే మన ప్రభ తెలియకుండానే ఈ తరం ప్రభావతిలా తయారయింది.....

స్నేహితులు పార్టీలు అంటూ పెద్దగా తిరగక పోయినా, తనకున్న చిన్నపాటి friends circleతో  బాగానే మాట్లాడుతూ, chatting గట్రా చేస్తూండేది ప్రభ ... పక్కనున్నోళ్ళని పట్టించుకోరు కానీ, ఎక్కడో ఉన్నోళ్ళ క్షేమ సమాచారాలు అడుగుతుంటారు ఈ whatsappల్లో అనుకుంటూ చిర్రుబుర్రులాడుతూండేది ప్రభావతమ్మ ... ఈ ఇద్దరి విసుర్లు చూస్తూ నవ్వుతూ మధ్యలో మన సుగుణ ...

                సశేషం ... next episodeతో మళ్ళీ కలుద్దాం .....

Next Episode